തിരുവനന്തപുരം: ഇനി കൂടോത്വവും ബ്ളാക്ക്മാസും ഊതി ഓടിക്കും ഒന്നും നടക്കില്ല, അവയെ എല്ലാം നേരിടാൻ പുതിയ നിയമങ്ങളും കടുത്ത ശിക്ഷകളുമായി സർക്കാർ വരുന്നു. മന്ത്രവാദം, ദുർമന്ത്രവാദം തുടങ്ങിയവ നിരോധിക്കുന്നതിനുള്ള നിയമം അടുത്ത നിയമസഭാ സമ്മേളനത്തിൽ പാസാക്കും; 22 തരം അന്ധവിശ്വാസപരവും ഹാനികരവുമായ ആചാരങ്ങൾക്ക് കർശനമായ ശിക്ഷയാണ് ഇതിൽ വ്യവസ്ഥ ചെയ്യുന്നത്. ജ്യോതിഷം, ക്ഷേത്ര ചടങ്ങുകൾ, പ്രാർത്ഥനകൾ, ശാരീരികമോ മാനസികമോ ആയ ദോഷം വരുത്താത്ത മറ്റ് ആചാരങ്ങൾ എന്നിവയ്ക്ക് അനുമതി ഉണ്ടായിരിക്കും.
മന്ത്രവാദം, അന്ധവിശ്വാസപരമായ പ്രവൃത്തികൾ എന്നിവയുമായി ബന്ധപ്പെട്ട 22 ഇനം കാര്യങ്ങളെ മൂന്ന് വിഭാഗങ്ങളായി തിരിച്ചിട്ടുണ്ട്. ആദ്യ വിഭാഗത്തിൽ ഉൾപ്പെടുത്തിയിട്ടുള്ള നരബലി, മരണം സംഭവിക്കാൻ കാരണമാകുന്ന ദുർമന്ത്രവാദ പ്രവൃത്തികൾ എന്നിവയ്ക്ക് ജീവപര്യന്തം തടവും പിഴയും ശിക്ഷയായി ലഭിക്കും. ഇത്തരം പ്രവൃത്തികൾ മൂലം മരണം സംഭവിക്കുകയാണെങ്കിൽ രാജ്യത്തെ ക്രിമിനൽ നിയമമായ ഭാരതീയ ന്യായ സംഹിത (BNS) പ്രകാരം വധശിക്ഷ വിധിക്കുന്നതിന് നിയമം തടസ്സമാകില്ല. രണ്ടാമത്തെ വിഭാഗത്തിൽ ലൈംഗിക ചൂഷണം, ശാരീരിക ആക്രമണം, ജീവന് ഭീഷണി എന്നിവ ഉൾപ്പെടുന്ന എട്ട് അന്ധവിശ്വാസ ആചാരങ്ങൾ ഉൾപ്പെടുന്നു. ഈ കുറ്റകൃത്യങ്ങൾക്ക് 10 വർഷം വരെ തടവും പിഴയും ലഭിക്കും. മൂന്നാമത്തെ വിഭാഗത്തിൽ സാമ്പത്തിക ചൂഷണം ഉൾപ്പെടെ 12 അത്തരം ആചാരങ്ങൾ ഉൾപ്പെടുന്നു ഇതിന് അഞ്ച് വർഷം വരെ തടവ് ശിക്ഷ ലഭിക്കും.
ഓരോ ജില്ലയിലും ബന്ധപ്പെട്ട ജില്ലാ എസ്പിമാരുടെ മേൽനോട്ടത്തിൽ, ഡിവൈഎസ്പിയുടെ നേതൃത്വത്തിൽ പ്രത്യേക അന്വേഷണ സംഘങ്ങൾ രൂപീകരിക്കും. എഡിജിപി (ക്രമസമാധാനം), ഡയറക്ടർ ജനറൽ ഓഫ് പ്രോസിക്യൂഷൻ, നിയമവകുപ്പ് പ്രതിനിധി എന്നിവരടങ്ങുന്ന സമിതി അന്വേഷണത്തിന്റെ മേൽനോട്ടം വഹിക്കും. ഇനി മന്ത്രവാദികളെല്ലാം ചേർന്ന് മുഖ്യമന്ത്രിക്ക് നേരേ കൂടോത്രം ചെയ്യുകയോ ഒടി വയ്ക്കുകയോ ചെയ്യുമോ എന്ന ആശങ്ക വേണ്ടല്ലോ?
A new law is coming against witchcraft, sorcery, and witchcraft. And severe penalties.
